Kako ja popizdin kad mi reču i kad rivan kapit da naši turišti i furešti poznaju Lipu nan Istru boje od nas domaćih. Ali bimo se mogli zapensat jeno malo, da. Sve hi je već ki se peju simo-tamo z bicikletami, kupuju hiže, hodiju naokolo, držiju predavanja o Velemu Jožetu i Pulskoj areni...
Ma biži, biži ca...

Ali ima i u temu nešto istine. Ča, tr mi jedino ča znamo je poj od oštarije do oštarije, bit pijani kako guzice, poć na more i ko ne daj Boh, živiš na selu, moraš poć u Buzet, Pazin, Pulu ili kadi drugde poli doktora ili ne znan, u Poreznu upravu... Ma zajebi stvar. Ča ne bi bilo boje da se i mi hitimo jeno malo u te turište, pa ko kadi oni faliju kada ti držiju predavanje, da in moreš kontrat da se useru i da vidiju da ne znaju ni po od onega ča znamo mi.

Levajmo se jeno malo, Istra ni velika, ma ko ne hitimo zajno u brzinu, ne bude nič od tega. Siditena bičikletu, nemojte poć na more samo u Poreč, morete koji put poć anka u Rovinj. Pomalo od sela do sela, preko 600 crikvah je u našoj Istri. Samo da znate kadi je koja ste upravili po dela. Ste pasali forši po kakovin kusu drage nan Parenzane, ste bili forši u Višnjanskoj zvjezdarnici? Znate vi kadi je Eufrazijeva bazilika? Ste pojili kakovu porciju pašte s tartufima u Livadah (ben to anke ko niste, van ne zamirin jer košta ko nova televizija)?

Ma nu, nemojte se jadit na mene, ja van sad ne držin predavanje, san i ja isti kako i vi. Ni nanka malo kativerije u temu ca van ja govorin. Ste čuli vi kad onu: "Svoje voli, a jucko štimaj"? Samo meni ne gre u glavu kako ćemo volit nešto ča nanke ne poznamo. A ben ben, ne rabi sada srat van bukalina, ja bin samo stija da mi svi jeno malo boje znamo tu našu Istru, ja se recimo sramin ča san samo 4-5 puti bija u Puli, od čega je 2-3 bilo ki san ša poli doktora, to skoro da i nebin broja. Samo nas je još takovih.

A oni dojdu tu deset dan u sedmen misecu, pa nanka ne greju na more nego se peju i gledaju, peju i gledaju, peju i gledaju... I onda opet dojdu drugo lito i opet isto delaju, pa treto lito kupiju dvi-tri hiže i onda ćemo bit u kur** za par lit kad nanka mi ne budemo imali kadi živit. Ali nemojmo poj van z teme.

Puštite delo i študjat kakovu nediju, ne rabi da brigate, ne ujde delo, ne...

Sidite na bicikletu i hote naokolo jeno malo.